بِنْت الخُرَّافة

ريحة نوّار عشِيَّة،

الصَّفصاف، و المشمُوم مرشُوق في لِيل شعر صبِيّة

الكْحُل المدغِّم عينِين ماخذة من مُوج البحر شويَّة

ورود مزيّنة خدُودها، و خُمسة معلّقة في جِيدها،

وين تمشي العينين الكُلّ عليها، اللّي يمدح و اللّي يذِمّ فيها

سِحرها ما يتقاوم، نْفس من أَنفس الآلهة هِيَ

و هيّ لاعلى بالها لا بهذَاكة لا بهذَا،

مابين اللّي عاشق في التراب اللّي تحت ساقيها، و اللّي ما خلىَّ كِلمة ماقالها فِيها

كانت تعرف اللّي كلامهم ما عندُو ما يغيِّر فيها.

عايشة بيّة زْمانها، ماعلى بَالها بكلام النَّاس فِيها،

كُل لِيلة، تكحَّل و تحَمِّر و تغَبِّر و تُخرج حورِيَّة

تبْدَى بتدُولِيشة عالبحر، و تُوفا بكَاس،

الكَاس هُو وْنِيسها، تِشْكِيلو ما عمْلت الدِّنيا و عْبادها فِيها

تِشْكِيلو من صاحبَة ثَيّقتها ياخي خانِتها، ظَنِّتها عشِيرتها ياخي في ظْهَرها طَعنِتها،

تِشْكِيلو من فْراق عِيلتها، و طلاق أُمّها و بُوها اللِّي كَمِّل على مرمِّتها،

تِشْكِيلو من حْبِيب، أمّنتُو و عطَاتو من رُوحها،

غْدَرها، و خلاَّها تواجِه في هَمّ الزّمان و كلاَم النَّاس وحَّدها

و من يومها حلفت أيمان لا عاد تأمن آدم.

سَارحة مع كَاسها، تخمِّم، تتذكِّر، و دَمعة متمرّدة تهبَط على خَدّها

" لا، حتَّى شيْ ما يستاهِل"

تحِلّ باكُو، و ترشِق سِيجارة بين شفَايفها
تشعّلها، تُنفخ دُخَّان، و يرجِع عقلهَا يُهرب بِيها..

هُوَّ، في زاوية مخبيَّة يُخزرلها،

يتبع كلّ حركَة من حَركاتها،

كلّ ترمِيشة من عِينيها،
كلّ نْفس،

" آلهة، مستحيل تكون إنس"

و يُغزر

ويتبِّع كلّ مرَّة يْمِسّ الكَاس شْفايفها،

و ما يهبِّط عِينو عليها،

و يتمنَّى في تلفِيتة و لاَّ لَمحة مِنها،

و هِيَّ، غارقَة في عَالِمها،

رجعت سنِين التَالِي في لَحظة اللِّي هُوَّ يِتكهِّن في سِرّها

يُرسم ألف و حكاية علِيها،

يتْخيّل رِيحتهَا و صُوتهَا، نْفَسهَا و سْكُوتها.

هِيَّ، ضَايْعة فِي سْحابة أفكَارها

و هُوَّ، ضَايع و هايِم في تفاصِيلها ..

  " بِنْت الخُرَّافة خَطْفِتلي قَلبِي"