نشوة ..

يعبق فِراشي برائحتك
بعد ليلة من التَقديس
و من النَشوة،
أشتمّ رائِحتك على مخدّتي
تخدّرني،
تبعث في جسدي رعشة
تذكّرني بليلة قضيناها بين شهوة و تعبّد
و أيّ تعبّد كان، 
آثارك اللتي مازالت تزيّن جسدي
تذكّرني بأنّك كنت هنا،
داخلي،
تبعثرني، ثمّ تلملم حطامي،
تملؤني نشوة و ألمًا،
ألمً يصرخ" أنتِ لِي
بنعراتِك و نظراتِك اللّتي تؤجج في شوقي لِلمسِك
و لخطِّ رغبتي، و إشباع توقي إليكِ"
آثار لازالت تؤنِسني
بعد ليلة من الشّهوات المحرّمة،
و ما حُرِّمت عليك شفتاي،
فما خٌلقتا إلّا لتقبِّلهما،
و لتروي نهمهما من رحيق هواك.
زُرقة و حُمرة تُزيّنني،
و أزدان بتلك الزينة
فلا أحلى و لا أشهى و لا أبقى من ما خطّني به معشوقي
يا من رماه القدر في طريقي
و يا لكرم قدري بجنّة على الأرض رُزقت حُبّها
حضنك و عيناك هما ملاذي و ملجئي،
ألتِحف رائحتك،
تُسكِرُني،
و الّلذة تسري في كامل جسدي،
تُؤرِقني،
تُتعبني،
و تُبعثرني
في بُعدِك. 

رسالة منسيّة.

• إيجا نغطيك و بالنّفس متاعي نِملاك و بشفايفي و رِيحتي نغرّقك تي أُقرب شبيك بعيد خايف و لاَّ ما تصبرش على عينيّ و صُوتي و لمسة يدّي تخلّيك تقشعر، تدخل بعضك، ما تفهم والو، و تخلّيك واحل و شارد. إيجا بحذايا و غطيني بهواك و حضنك و صدرك اللي مشتاقة نحسو نحب نتنفس هواك و نسرح في عينيك، و تبوسني، أكا البوسة البنينة اللي ترد فيا الروح و ترجعني للثنية تي ما نحبش نرجعلها نحب نضيع فيك و في تفاصيلك، نحب نسرح و نذوب بين يديك ..

  ظلام و الحفيانة مونستنا أما غير صوت النفس متاعك ما نسمع. أملاني، أحييني و أقتلني بين يديك. أوجعني و ما ترحمني، خلينيما نشهد كان بإسمك. كسرلي ضلوعي و حيرني. "إنت متاعي" نحب نسمعها بصوتك، همسة في وذني، تملاني من راسي لطراطش صوابعي، لآخر خلية في بدني، تهزني و تنفضني، تطلعني لسابع سماء و تسيبني ..

  إيجا أقرب و بدفايا خليني نرويك و الرويحة نرجعها فيك. إيجا يا شهريار حياتي إيجا خليني معاك ليلة ولا كل الليالي، ننسى روحي و إنسيك في روحك. إيجا تبع ضلوعي بالنفس متاعك، سخون، بريحة الياسمين إيجا اعبدلي بدني و قدسو و حيرو و ما تخليه يذوق النوم، و ما تخللي عينيا تذوق النوم .. يا شهريار ..

  إيجا ..
• 
  

  
  

  
  

  

  
  

بِنْت الخُرَّافة

ريحة نوّار عشِيَّة،

الصَّفصاف، و المشمُوم مرشُوق في لِيل شعر صبِيّة

الكْحُل المدغِّم عينِين ماخذة من مُوج البحر شويَّة

ورود مزيّنة خدُودها، و خُمسة معلّقة في جِيدها،

وين تمشي العينين الكُلّ عليها، اللّي يمدح و اللّي يذِمّ فيها

سِحرها ما يتقاوم، نْفس من أَنفس الآلهة هِيَ

و هيّ لاعلى بالها لا بهذَاكة لا بهذَا،

مابين اللّي عاشق في التراب اللّي تحت ساقيها، و اللّي ما خلىَّ كِلمة ماقالها فِيها

كانت تعرف اللّي كلامهم ما عندُو ما يغيِّر فيها.

عايشة بيّة زْمانها، ماعلى بَالها بكلام النَّاس فِيها،

كُل لِيلة، تكحَّل و تحَمِّر و تغَبِّر و تُخرج حورِيَّة

تبْدَى بتدُولِيشة عالبحر، و تُوفا بكَاس،

الكَاس هُو وْنِيسها، تِشْكِيلو ما عمْلت الدِّنيا و عْبادها فِيها

تِشْكِيلو من صاحبَة ثَيّقتها ياخي خانِتها، ظَنِّتها عشِيرتها ياخي في ظْهَرها طَعنِتها،

تِشْكِيلو من فْراق عِيلتها، و طلاق أُمّها و بُوها اللِّي كَمِّل على مرمِّتها،

تِشْكِيلو من حْبِيب، أمّنتُو و عطَاتو من رُوحها،

غْدَرها، و خلاَّها تواجِه في هَمّ الزّمان و كلاَم النَّاس وحَّدها

و من يومها حلفت أيمان لا عاد تأمن آدم.

سَارحة مع كَاسها، تخمِّم، تتذكِّر، و دَمعة متمرّدة تهبَط على خَدّها

" لا، حتَّى شيْ ما يستاهِل"

تحِلّ باكُو، و ترشِق سِيجارة بين شفَايفها
تشعّلها، تُنفخ دُخَّان، و يرجِع عقلهَا يُهرب بِيها..

هُوَّ، في زاوية مخبيَّة يُخزرلها،

يتبع كلّ حركَة من حَركاتها،

كلّ ترمِيشة من عِينيها،
كلّ نْفس،

" آلهة، مستحيل تكون إنس"

و يُغزر

ويتبِّع كلّ مرَّة يْمِسّ الكَاس شْفايفها،

و ما يهبِّط عِينو عليها،

و يتمنَّى في تلفِيتة و لاَّ لَمحة مِنها،

و هِيَّ، غارقَة في عَالِمها،

رجعت سنِين التَالِي في لَحظة اللِّي هُوَّ يِتكهِّن في سِرّها

يُرسم ألف و حكاية علِيها،

يتْخيّل رِيحتهَا و صُوتهَا، نْفَسهَا و سْكُوتها.

هِيَّ، ضَايْعة فِي سْحابة أفكَارها

و هُوَّ، ضَايع و هايِم في تفاصِيلها ..

  " بِنْت الخُرَّافة خَطْفِتلي قَلبِي"    

.مَدّ و جزْر

إنت كمالة التَّنهيدة

إنت وجيعة بعد تفرهيدة

إنت نار شاعلة، لاهبة، فِيَّا وڨَّادة وڨِيدة

إنت نجمة تضويلِّلي طريقي، أمّا غايبة عندها مدِيدة

إنت منامة، لا نجّمت نعيشها لا نفيق مِنها

أمانة عليك لا تعذِّبني، لا تُوجعني أكثر لا تغرَّقني

أمانة لا تزيد تعلَّقني، تبهذِل بحالي و ما تعْتقنِي

يزِّي مالسّكات،  حْرقني بجمرُو

،تِمشي و ترجع، و أنا هنا كالمُوجة هَايمة في بحر حِيرتي

،لا عرفتك آش تحب

. إمشي و خلِّيني، أرحملي

على خاطر ماعادش بش نِستنَّى

ماعادش بش نسهر اللّيالي نمنِّي في روحي اللِّي بش ترجع، اللِّي ما ليك غِيري

ماعادش بش نِشكي وجِيعتي لنْجوم الفَجر، و لأوّل خِيط من خيُوط الشَّمس

ماعادش بش نقُول اللّي بُعدك عليَّا نار، على خاطر انت النَّار

إنت اللِّي ذكِّيتها فِيّا

إنت اللِّي عذَّبتلي جرحاتي

إنت اللِّي كويتني

.إنت اللِّي بِعمايلك، قْصفتلِي قَطعة من رُوحي

ماعادش بش نِستنَّاك

ماعادش بش نعيش بخْيالك

ماعادش بش نصبِّر روحي بكِذباتك

ماعاد كِلماتك تأثِّر فيَّا، ماعاد رِيحتك تِسكرني، و تِغلبني ب ضَحكة بنينة، خبيثة

،ولاعاد ليك حاجة عندِي، خذيتلي نْفس من رُوحي و ذُبت

 ماعادش ترجع، أعْتقني و خلِّيني

.أنا ماعادش ليك

شهريار

شنيّة أنا إنجم نعطي للرَّاجل اللِّي عندو كل شيّ؟

الرّجل المثالي كيما يقولو، حُلم كل صبيّة

بشنيَّة إِنَّجم نوِدُّو؟

،تي مفاتح الجنَّة في يدُّو

لا مُش ظاهرلي، أكيد

،ت يُطلب نجمة مالسّما تجِيه على طبق ذهب

،ساحر كلام

،ما تنجَّمش تقاوم سِحر كلماتو

،و لا سِحر عِينيه

 ..و لا تفَّاحة آدم

،تيه هاني سرحت مع تفاصِيلك، ديما هكَّة مسافرلي بعقلي و هارِب بيه

.ت آش مازال فيه

،شنيَّة أنا للرَّاجل اللِّي الملايكة مزيّنتو

،وُجودك أصلا معْجزة، ما تتعاود

،الكلام يُهرب من شْفايفي في حضُورك

،و أنا اللِّي يقولو عليها لا تِتعب لا تكِلّ لا تملّ

،هاو جاء شكون اللي غِلبك

أنا اللِّي الكلام ما يأثَّر فيَّا، عبِّيت مِنُّو شْكاير

،و الوعود ماعاد نصدِّق

ت بيَّاعة كلام للمراكب

للعُشاق

،للّي ينساو

،للّي يخونو

،للّي يعبدو

،للّي يفقدو

،للّي يموتو

،نعرف شنيَّة اللي يِتقال و وقتاش

،نْقيس و نغِيس و ندوِّرها ألف مرَّة

،اللِّي ياما حِلفو بِيَّا

قالولي: آلهة الكلام سمَّاوك

،ت آش نجي قُدامِّك

،آش نجي في غزرة مِنّك

،و إلاَّ في بسمة في فُمّك

،و إلاَّ في همسة من صوتك

 ..و إلاَّ و إلاَّ و إلاَّ

،شُفت هاني عاوِدت سرحت

،تِ ماللِّي زُرت مْنامي و أنا ماعادش أنا

،لا كلامي هُوَّ

،لا ضحكي هُوَّ

،مرضِي ما فِيه دوا

،و إنت آش يِغلبك يا شَهريار

،الحُسن مْخمِّس تحت يدِّك

،يستنَّى في تحرِيكة مِنّك

،تي جِنِّيات دايْرِين بِيك

 ..و أنا آش جِيت

.ب آش إنَّجم نوِِّدّ الرَّاجل اللِّي الدِّنيا في كْفوف يدِيه